Isa 6 | KYC | STEP | Ee kana kiŋi Usaya kumuyamo dokopa Kamongo doko kandeyo. Baa kiŋinya petenge isa dokona mupwa ingyuo peteyamo dokopa banya komau londe dokome tembole anda panda dokona soo simbwaya.

Isaiah 6

Anatumi Aisaya Poropeta Akali Ingyuo Karena Lao Kee Leya

1 Ee kana kiŋi Usaya kumuyamo dokopa Kamongo doko kandeyo. Baa kiŋinya petenge isa dokona mupwa ingyuo peteyamo dokopa banya komau londe dokome tembole anda panda dokona soo simbwaya. 2 Baa peteya dokona lee renge bange lapo karo awali leyaminyi kandeyo. Dusipana mendaki mendaki lao range dokona papake pakinyamange karapa piyamo kareyaminyi kandeyo. Lee renge bange mendaki dokome rangena papake pakinyamange dokona lamame nyuo lenge kambu yambe pyao lamame nyuo yanenge dokona yambe pyao lamame nyuo bii lao pao pipa peyaminyi kandeyo. 3 Nakama range yango sukusa pii lao alowa pyuo lao,

Poo pyasi, poo pyasi, poo pyasi,
Kamongo Porai Wakasa doko poo pyasi.
Banya neta renge yulu dokome yuu muu dupwana soo kapa kapa pinyale
leyami.

4 Pii poporambaiye dokome tembole anda doko minyuo pyuku pyuku lapala isare kyau lao rali piya.

5 Dopa piyasa namba kumuo kaeyalyano lao mee kikurenge doko kareyo. Karo suu pyao, Nambame kambunya pii epenge dupwa karo petenge dupwako epenge dokoŋo dee wambu pii koo kambunya lao piso palyuo piminyi dupwa pipya piso palyuo pyuo karenge. Dopa pyuo karapunupape nambana lenge angi dokome Kamongo Porai Wakasa Kiŋi doko angi kandelyo lao suu piyu.

6 Dokopa lenge renge bange dokona mende namba kareyo dokona petakareme isarena kana pyare lasinya kiso maingi dokona isa lengya mende rapo nyiyande minyuo epeya. 7 Epapala isa lengya rao siya dokome nambana kambu dokona warendapala lao dakepa embena koo dupwa pupyamopa nyuo kame sakao kaeyasi silyamo, leya. 8 Enakana Kamongome lalyiyamo siyunupa lao, Api mendali mapanyi nembarope? Apimi mendeme nambana pii minyakao parape? leyamo siyu.

Sepala nambame baa lamaiyuo, Namba parowale. Nembena, leyo. 9 Dokopa namba pao wambu dupwa pii dake lamaiyape, leya. Kamame malu soo kararaminyipape angi doko soo rola narami. Kamame malu kando kararaminyipape angi doko apa pipala pilyamo lao angi kando gisapa narami, leya. 10 Lapala namba langyuo, Nakama lengeme kando kaleme soo suu pinginya soo manji nyuo kara narami lao wambu dusipana suu pingi kendanyi nembo kale kata poeyanyi nembo lenge iminjinyi pyambuo karape. Nakama soo manji nyuo karamili mona kapu kyimili dokome namba pyuo nyipuli, leya.

11 Dokopa nambame baa piso soo, Kamongo yuu gii akipare dopale ingyuo serape? leyo.

Baame isingi langyuo, Yuu taone andake dupwa kwaeyo alowa pyuo iki sero dee anda dupwa pii karo dee yuu angi doko muiyane ingyuo soo piramo dokopa lalono dopale pira, leya. 12 Nambame wambu dupwa nanesa nembapala yuu doko peparae apa sinya lao piru, leya. 13 Wambu akalisa dokona doloma pena lapala mendaki karo kaeyara ramo doko isa kapya angi doko poko mapu pipala angalu doko yaki nyilyaminyi doloma rapala ralamuli pyuo kokwa soo para.

(Isa yanengena kongwalu pii doko Anatumi banya wambu keta yulu enenge pyakamira dokona letamo.)